太陽報
拒續約無線懶理拍MV
千嬅孖同門全體玩失蹤
22/04/2008
文： 影視組
被視為「大婆台」的無線，坐擁多位當紅歌手的合約，但近年多位人氣歌手不賣帳而紛紛離巢，如陳慧琳及楊千嬅相繼不續約。昨日無線為歌曲《光輝大地》拍攝MV，千嬅連同其所屬唱片公司的歌手竟全體失蹤，雙方解釋更出現羅生門。
出名聲大的無線，擁有全港大部分歌手的歌星合約，歌手為免得罪無線，面對其他電視台的邀請均退避三舍。不過，自愈來愈多電視媒體加入，無線的優勢起了變化，多位當紅歌手如陳慧琳、張學友及張柏芝等，為求演出有更大自由度，相繼不與無線續約。昨日無線為08運動會主題曲《光輝大地》拍攝MV，早前傳出因冇獎而拒續約的楊千嬅竟然缺席，連同其所屬的Amusic的旗下歌手亦冇到，包括黎明、衛蘭、衛詩、應昌佑及光良等，令焦點落在去年最佳男、女歌手得主陳奕迅（Eason）及容祖兒（Joey）身上。
對於疑被飛出MV錄影，昨日千嬅出席另一活動時表示全不知情︰「要問番老闆黎生（黎明），我知佢忙，不過公事會即覆。（會唔會覺得可惜？）我都唔知，可能佢知我要預備做火炬手，或者我係代表澳門！你查澳門電視台！」
祖兒：佢有佢諗法！
記者找到MV監製潘裕佳，他指早已通知Amusic：「佢話冇期！（係唔係冇約的歌手就唔請？）我有問過，但佢冇期唔到。」不過，Amusic高層王凱文則有另一說法：「無線冇搵過我，絕對唔係我拉大隊唔去！」可是，其後他透過助手再次致電記者說：「無線有通知我，但係因為佢冇期，總之我同無線合作得好愉快，之後都合作做大騷。」看來有前言不對後語之嫌！
對於千嬅及何韻詩失蹤，Joey也忍不住說：「唔怪得靜咁多，仲以為佢未到！（少千嬅呢個勁敵？）唔好講呢衰！（千嬅唔續約無線喎！）佢有佢諗法，我係有抱負的人，希望可以將自己的歌傳到全世界。（唔續約空間大？）OK啦！我依家同無線關係好舒服，仲想Keep住。」
Eason：要尊重合約！
而千嬅的好友Eason對此事亦表示不知情：「我同TVB仲有約，幾耐就唔清楚，依家同無線關係好，無需要轉，電視係歌手宣傳的好渠道，不過如果可以係第二地方唱歌都幾過癮！我就未試過，尊重合約精神嘛！」提到Amusic全體缺席，Eason不置可否，認為只要唱好歌就可以，而無線契仔李克勤則笑言：「我與世無爭，總之每個人都有權做佢想做的事！」
另外，有指古巨基將離開無線，他昨日表示剛返港而不知情：「一句講哂，流料一則！（向無線解釋？）唔使！我同無線有特別感情，冇打算離開！（ 一世都係無線？）結婚都唔夠膽話一世啦！」
No comments:
Post a Comment